Nordex SE Almaniyanın külək enerjisi sahəsində fəaliyyət göstərən böyük sənaye şirkətidir. Şirkət 1985-ci ildə yaradılıb və əsas məqsədi külək turbinlərinin istehsalı və quraşdırılması olub. 1990-cı illərdən etibarən iri güclü turbinlər istehsal etməyə başlayıb və zamanla Avropanın aparıcı külək texnologiyası şirkətlərindən birinə çevrilib. 2016-cı ildə İspaniyanın Acciona Windpower şirkəti ilə birləşməsi Nordex-in bazardakı mövqeyini daha da gücləndirib.

Nordex əsasən quru ərazilərdə qurulan (onshore) külək elektrik stansiyaları üçün turbinlər istehsal edir. Şirkətin fəaliyyəti təkcə istehsalla bitmir. O, həm də külək parklarının layihələndirilməsi, quraşdırılması və uzunmüddətli texniki servis xidmətlərini həyata keçirir. Xüsusilə servis müqavilələri şirkət üçün sabit gəlir mənbəyi sayılır, çünki quraşdırılmış turbinlər illərlə baxım tələb edir.

Şirkət Avropa, ABŞ, Türkiyə, Azərbaycan ,Latın Amerikası və digər regionlarda fəaliyyət göstərir. Nordex-in səhmləri Almaniyada Frankfurt Birjasında NDX1 kodu ilə ticarət olunur. Şirkət əsasən böyüməyə fokuslandığı üçün müntəzəm dividend ödənişi etmir və investorlar üçün əsas qazanc səhm qiymətinin artımı hesab olunur.